ಮೊಬೈಲ್ ಗ್ರಾಹಕರಿಗೆ ಬಿಗ್ ನ್ಯೂಸ್: ಇನ್ನು ಮುಂದೆ 28ರ ಬದಲು 30 ದಿನಗಳ ರೀಚಾರ್ಜ್ ಪ್ಲಾನ್ ಲಭ್ಯ!

ದೇಶದ ಮೊಬೈಲ್ ಬಳಕೆದಾರರಿಗೆ ಕೇಂದ್ರ ಸರ್ಕಾರ ಸಿಹಿ ಸುದ್ದಿ ನೀಡಿದೆ. ಸದ್ಯ ಬಹುತೇಕ ಟೆಲಿಕಾಂ ಕಂಪನಿಗಳು 28 ದಿನಗಳ ವ್ಯಾಲಿಡಿಟಿ ನೀಡುತ್ತಿದ್ದು, ಇದರಿಂದ ಗ್ರಾಹಕರು ವರ್ಷಕ್ಕೆ 13 ಬಾರಿ ರೀಚಾರ್ಜ್ ಮಾಡಬೇಕಾದ ಅನಿವಾರ್ಯತೆ ಇತ್ತು. ಈ ಬಗ್ಗೆ ಸಂಸದ ರಾಘವ್ ಚಡ್ಡಾ ರಾಜ್ಯಸಭೆಯಲ್ಲಿ ಧ್ವನಿ ಎತ್ತಿದ್ದರು. ಇದರ ಬೆನ್ನಲ್ಲೇ ಕೇಂದ್ರ ಟೆಲಿಕಾಂ ಸಚಿವ ಜ್ಯೋತಿರಾಧಿತ್ಯ ಸಿಂಧಿಯಾ ಅವರು, ಎಲ್ಲಾ ಆಪರೇಟರ್‌ಗಳು ಕಡ್ಡಾಯವಾಗಿ 30 ದಿನಗಳ ರೀಚಾರ್ಜ್ ಆಯ್ಕೆಯನ್ನು ಗ್ರಾಹಕರಿಗೆ ನೀಡಬೇಕು ಎಂದು ಸೂಚನೆ ನೀಡಿದ್ದಾರೆ.

ಈ ಹೊಸ ಸೂಚನೆಯಿಂದಾಗಿ ಗ್ರಾಹಕರಿಗೆ ತಮ್ಮ ಅನುಕೂಲಕ್ಕೆ ತಕ್ಕಂತೆ ತಿಂಗಳ ಪೂರ್ತಿ ಅನ್ವಯವಾಗುವ ಪ್ಲಾನ್ ಆರಿಸಿಕೊಳ್ಳಲು ಅವಕಾಶ ಸಿಗಲಿದೆ. ಕೇವಲ 28 ದಿನಗಳ ಪ್ಲಾನ್ ಇರಬಾರದು ಎಂದಲ್ಲ, ಆದರೆ ಅದರ ಜೊತೆಗೆ 30 ದಿನಗಳ ಸ್ಪಷ್ಟ ವ್ಯಾಲಿಡಿಟಿ ಹೊಂದಿರುವ ಪ್ಲಾನ್‌ಗಳು ಲಭ್ಯವಿರಬೇಕು ಎಂಬುದು ಸರ್ಕಾರದ ಆಶಯವಾಗಿದೆ. ಈ ಹಿಂದೆ 2022ರಲ್ಲೇ ಟ್ರಾಯ್ ಈ ಬಗ್ಗೆ ಸೂಚನೆ ನೀಡಿದ್ದರೂ, ಕೆಲವು ಕಂಪನಿಗಳು ದುಬಾರಿ ದರ ನಿಗದಿಪಡಿಸಿದ್ದವು. ಈಗ ಇದನ್ನು ಸರಳಗೊಳಿಸಿ ಎಲ್ಲಾ ಆಪರೇಟರ್‌ಗಳು ಜಾರಿಗೆ ತರಬೇಕಿದೆ.

ಇನ್ನು ಡೇಟಾ ಬಳಕೆಯ ವಿಷಯದಲ್ಲೂ ಮಹತ್ವದ ಚರ್ಚೆ ನಡೆದಿದೆ. ಪ್ರತಿದಿನ ಸಿಗುವ ಡೇಟಾದಲ್ಲಿ ಬಳಸದೆ ಉಳಿದ ಭಾಗವನ್ನು (ಉದಾಹರಣೆಗೆ 1.5 ಜಿಬಿಯಲ್ಲಿ ಉಳಿದ 500 ಎಂಬಿ) ಮರುದಿನಕ್ಕೆ ವರ್ಗಾಯಿಸುವ (Data Rollover) ಬಗ್ಗೆ ರಾಘವ್ ಚಡ್ಡಾ ಮನವಿ ಮಾಡಿದ್ದರು. ಬಳಸದ ಡೇಟಾ ವ್ಯರ್ಥವಾಗಬಾರದು ಎಂಬ ಈ ಬೇಡಿಕೆಯನ್ನು ಕೇಂದ್ರ ಸರ್ಕಾರ ಗಂಭೀರವಾಗಿ ಪರಿಗಣಿಸುವುದಾಗಿ ತಿಳಿಸಿದೆ. ಇದರಿಂದ ಸಾಮಾನ್ಯ ಜನರಿಗೆ ಆರ್ಥಿಕವಾಗಿ ಹೆಚ್ಚಿನ ಲಾಭವಾಗಲಿದ್ದು, ಟೆಲಿಕಾಂ ವಲಯದಲ್ಲಿ ಗ್ರಾಹಕ ಸ್ನೇಹಿ ಬದಲಾವಣೆಗಳು ನಿರೀಕ್ಷಿತವಾಗಿವೆ.