ಮಂಗಳೂರು: ಯುದ್ಧದ ಕಾರ್ಮೋಡ; ಪಾತಾಳಕ್ಕೆ ಕುಸಿದ ಮೀನಿನ ದರ

​ಕೊಲ್ಲಿ ರಾಷ್ಟ್ರಗಳ ಯುದ್ಧದ ಭೀತಿಯು ಕರಾವಳಿಯ ಮೀನುಗಾರಿಕೆ ಉದ್ಯಮವನ್ನು ಸಂಕಷ್ಟಕ್ಕೆ ದೂಡಿದೆ. ರಫ್ತು ವಹಿವಾಟು ಸಂಪೂರ್ಣ ಸ್ಥಗಿತಗೊಂಡಿರುವುದರಿಂದ ಮಾರುಕಟ್ಟೆಯಲ್ಲಿ ಮೀನಿನ ಬೇಡಿಕೆ ಕುಸಿದಿದ್ದು, ಪ್ರತಿ ಕೆಜಿಗೆ ಸುಮಾರು 100 ರಿಂದ 200 ರೂಪಾಯಿಗಳಷ್ಟು ದರ ಇಳಿಕೆಯಾಗಿದೆ. ಇದರಿಂದ ಮೀನುಗಾರರು ಮತ್ತು ವ್ಯಾಪಾರಸ್ಥರು ಅಸಲು ಕೂಡ ಸಿಗದೆ ಕಣ್ಣೀರು ಹಾಕುವಂತಾಗಿದೆ.

​ಅಡುಗೆ ಅನಿಲದ (LPG) ವ್ಯತ್ಯಯ ಹಾಗೂ ಯುದ್ಧದ ಆತಂಕದಿಂದಾಗಿ ನಗರದ ಪ್ರಮುಖ ಮೀನು ಉಟದ ಹೋಟೆಲ್‌ಗಳು ಮುಚ್ಚುತ್ತಿವೆ. ಹೋಟೆಲ್ ಮಾಲೀಕರು ಮಾರುಕಟ್ಟೆಗೆ ಬಾರದ ಕಾರಣ ಲಕ್ಷಾಂತರ ರೂಪಾಯಿ ಮೌಲ್ಯದ ವಹಿವಾಟು ಸ್ಥಗಿತಗೊಂಡಿದೆ. ನಿತ್ಯದ ವ್ಯಾಪಾರವನ್ನೇ ನಂಬಿಕೊಂಡಿದ್ದ ಮೀನುಗಾರ ಮಹಿಳೆಯರು ಗಿರಾಕಿಗಳಿಲ್ಲದೆ ತೀವ್ರ ಆರ್ಥಿಕ ನಷ್ಟ ಅನುಭವಿಸುತ್ತಿದ್ದಾರೆ.

​ಜಾಗತಿಕ ಮಟ್ಟದ ಯುದ್ಧದ ಛಾಯೆ ಸ್ಥಳೀಯ ಮೀನುಗಾರರ ಜೀವನಾಡಿಯ ಮೇಲೆ ಪೆಟ್ಟು ನೀಡಿದೆ. ಇಂಧನ ಬೆಲೆ ಏರಿಕೆ ನಡುವೆ ಮೀನಿನ ದರ ಕುಸಿತವು ಮೀನುಗಾರಿಕಾ ಬೋಟ್‌ಗಳ ನಿರ್ವಹಣೆಯನ್ನು ಕಷ್ಟಸಾಧ್ಯವಾಗಿಸಿದೆ. ರಫ್ತು ಪ್ರಕ್ರಿಯೆ ಪುನಾರಂಭಗೊಳ್ಳದಿದ್ದರೆ ಕರಾವಳಿಯ ಆರ್ಥಿಕ ಸ್ಥಿತಿ ಮತ್ತಷ್ಟು ಹದಗೆಡುವ ಆತಂಕ ಎದುರಾಗಿದೆ.