ಆಸ್ತಿ ಮತ್ತೊಬ್ಬರ ಪಾಲಾಗುವ ಭಯ; ₹6 ಲಕ್ಷಕ್ಕೆ ತಂದೆಯ ಹತ್ಯೆಗೆ ಪುತ್ರನಿಂದ ಸುಪಾರಿ?

ಕಾನ್ಪುರ: ತಂದೆಯ ಆಸ್ತಿ ಮತ್ತೊಬ್ಬ ಮಹಿಳೆಯ ಹೆಸರಿಗೆ ವರ್ಗಾವಣೆಯಾಗಬಹುದು ಎಂಬ ಭಯ ಹಾಗೂ ₹40 ಲಕ್ಷಕ್ಕೂ ಅಧಿಕ ಸಾಲದ ಹಿನ್ನೆಲೆ 60 ವರ್ಷದ ಔಷಧ ವ್ಯಾಪಾರಿ ತಂದೆಯನ್ನು ಕೊಲ್ಲಲು ಪುತ್ರನೇ ಸಂಚು ರೂಪಿಸಿದ್ದಾನೆ ಎಂದು ಕಾನ್ಪುರ ಪೊಲೀಸರು ತಿಳಿಸಿದ್ದಾರೆ.

ಬಿರ್ಹಾನಾ ರಸ್ತೆಯಲ್ಲಿ ಔಷಧ ವ್ಯಾಪಾರ ನಡೆಸುತ್ತಿದ್ದ ವಿನೀತ್ ಮನೋಚಾ ಅವರನ್ನು ಸೆ.5ರಂದು ಕಲ್ಯಾಣಪುರದ ರತನ್ ಆರ್ಬಿಟ್ ಅಪಾರ್ಟ್‌ಮೆಂಟ್‌ನಲ್ಲಿ ಇರಿದು ಹತ್ಯೆ ಮಾಡಲಾಗಿತ್ತು. ಪ್ರಕರಣದಲ್ಲಿ ಪುತ್ರ ಸುಬ್ರತ್ ಮನೋಚಾನನ್ನು ಬುಧವಾರ ರಾತ್ರಿ ಬಂಧಿಸಿ, ಗುರುವಾರ ನ್ಯಾಯಾಂಗ ಬಂಧನಕ್ಕೆ ಕಳುಹಿಸಲಾಗಿದೆ.

ತನಿಖೆಯಲ್ಲಿ ಸುಬ್ರತ್‌ಗೆ ಜೂಜು ಹಾಗೂ IPL ಬೆಟ್ಟಿಂಗ್‌ನಿಂದ ₹40 ಲಕ್ಷಕ್ಕೂ ಅಧಿಕ ಸಾಲವಿತ್ತು ಎನ್ನಲಾಗಿದೆ. ತಂದೆ ಹಲವು ಮಹಿಳೆಯರೊಂದಿಗೆ ಸಂಬಂಧ ಹೊಂದಿದ್ದು, ಆಸ್ತಿ ಮತ್ತೊಬ್ಬ ಮಹಿಳೆಯ ಹೆಸರಿಗೆ ವರ್ಗಾಯಿಸಬಹುದು ಎಂಬ ಆತಂಕದಿಂದ ಕೊಲೆಗೆ ಸಂಚು ರೂಪಿಸಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.

ಈ ಹಿಂದೆ ಸುಬ್ರತ್‌ನ ಪತ್ನಿ ಶಾಲು ಮನೋಚಾ ಹಾಗೂ ಆರೋಪಿತ ಸುಪಾರಿ ಹಂತಕರಾದ ವಿಶಾಲ್ ಮತ್ತು ರಾಜಕಿಶೋರ್ರನ್ನು ಪೊಲೀಸರು ಬಂಧಿಸಿದ್ದರು. ಆದರೆ ಹೊಸ ತನಿಖೆಯಲ್ಲಿ ಶಾಲು ವಿರುದ್ಧ ಸಾಕಷ್ಟು ಪೂರಕ ಸಾಕ್ಷ್ಯ ಸಿಕ್ಕಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ. ಅವರಿಗೆ ಇನ್ನೂ ಕ್ಲೀನ್‌ಚಿಟ್ ನೀಡಿಲ್ಲ.

ಕಾಲ್ ಡೀಟೇಲ್ ರೆಕಾರ್ಡ್ಸ್, CCTV, ಡಿಜಿಟಲ್ ಹಾಗೂ ವೈಜ್ಞಾನಿಕ ಸಾಕ್ಷ್ಯಗಳ ಆಧಾರದಲ್ಲಿ ತನಿಖೆ ಮುಂದುವರಿದಿದೆ. ವಿಶಾಲ್, ಸುಬ್ರತ್‌ನ ಸೂಚನೆಯಂತೆ ಹತ್ಯೆ ಮಾಡಬೇಕಿತ್ತು ಮತ್ತು ₹6 ಲಕ್ಷ ನೀಡುವುದಾಗಿ ಭರವಸೆ ನೀಡಲಾಗಿತ್ತು ಎಂದು ಹೇಳಿದ್ದಾನೆ. ಆದರೆ ಪೊಲೀಸರು ಈ ಆರೋಪಗಳನ್ನೂ ಇತರೆ ಸಾಕ್ಷ್ಯಗಳೊಂದಿಗೆ ಪರಿಶೀಲಿಸುತ್ತಿದ್ದಾರೆ.