ಕಿಡಿಗೇಡಿಗಳ ಕೃತ್ಯಕ್ಕೆ 300 ಅಡಿಕೆ ಮರಗಳು ಭಸ್ಮ: ಕಡಬದ ಯೇನೆಕಲ್‌ನಲ್ಲಿ ಕಂಗಾಲಾದ ರೈತ ಕುಟುಂಬ

ಕಡಬ ತಾಲೂಕಿನ ಯೇನೆಕಲ್ ಗ್ರಾಮದ ರೈತ ಗಿರಿಧರ ಅಂಬೆಕಲ್ಲು ಎಂಬುವವರ ತೋಟದಲ್ಲಿ ಕೊಳೆ ರೋಗ ನಿಯಂತ್ರಣಕ್ಕಾಗಿ ಮೈಲುತುತ್ತು ದ್ರಾವಣ ಸಿಂಪಡಿಸಿದ ಕೇವಲ ಮೂರೇ ದಿನದಲ್ಲಿ ಸುಮಾರು 300ಕ್ಕೂ ಹೆಚ್ಚು ಅಡಿಕೆ ಗಿಡ ಮತ್ತು ಮರಗಳು ಸಂಪೂರ್ಣವಾಗಿ ಕರಟಿ ಹೋಗಿರುವ ದಾರುಣ ಘಟನೆ ವರದಿಯಾಗಿದೆ. ಜೂನ್ 19ರಂದು ಸಿಂಪಡಿಸಲಾಗಿದ್ದ ದ್ರಾವಣದ ಮೊದಲ ಬ್ಯಾರೆಲ್‌ನಲ್ಲಿದ್ದ ರಾಸಾಯನಿಕದಿಂದಾಗಿ ಈ ದುರಂತ ಸಂಭವಿಸಿದ್ದು, ಕಣ್ಣೆದುರೇ ಒಣಗುತ್ತಿರುವ ಮರಗಳನ್ನು ಕಂಡು ರೈತ ಕುಟುಂಬ ಕಂಗಾಲಾಗಿದೆ.

ತೋಟದ ಆರಂಭದ ಭಾಗದಲ್ಲಿ ಸಿಂಪಡಿಸಲಾಗಿದ್ದ ಒಂದು ಡ್ರಂ ದ್ರಾವಣದ ಜಾಗದಲ್ಲಿ ಮಾತ್ರ ಗಿಡಗಳು ಸುಟ್ಟು ಹೋಗಿದ್ದು, ತೋಟದ ಇತರ ಭಾಗಗಳಲ್ಲಿ ಯಾವುದೇ ಹಾನಿಯಾಗಿಲ್ಲ. ಹೀಗಾಗಿ ಯಾರೋ ಉದ್ದೇಶಪೂರ್ವಕವಾಗಿ ಮರ ಮತ್ತು ಹುಲ್ಲು ಸಾಯಿಸಲು ಬಳಸುವ ‘ರೌಂಡಪ್’ ಎಂಬ ವಿನಾಶಕಾರಿ ರಾಸಾಯನಿಕ ಪುಡಿಯನ್ನು ಆ ನಿರ್ದಿಷ್ಟ ಡ್ರಂಗೆ ಬೆರೆಸಿರುವ ಬಲವಾದ ಶಂಕೆ ವ್ಯಕ್ತವಾಗಿದೆ. ಆದರೆ ತಮಗೆ ಯಾರೂ ಶತ್ರುಗಳಿಲ್ಲ ಎಂದು ಮಾಲೀಕರು ತಿಳಿಸಿದ್ದು, ಘಟನೆ ತೀವ್ರ ಗೊಂದಲ ಮೂಡಿಸಿದೆ.

ಇದು ಮೈಲುತುತ್ತಿನ ಗುಣಮಟ್ಟದ ಸಮಸ್ಯೆಯಲ್ಲ, ಬದಲಿಗೆ ಯಾರೋ ಕಿಡಿಗೇಡಿಗಳು ಮಾಡಿದ ಕೃತ್ಯ ಎಂದು ಮಾಲೀಕ ಗಿರಿಧರ ಅಂಬೆಕಲ್ಲು ಆಘಾತ ವ್ಯಕ್ತಪಡಿಸಿದ್ದಾರೆ. ವರ್ಷಪೂರ್ತಿ ಕಷ್ಟಪಟ್ಟು ಬೆಳೆಸಿದ ಫಸಲು ನೀಡುವ ಮರಗಳು ನಾಶವಾಗಿದ್ದು, ಸ್ಥಳೀಯ ಕೃಷಿ ಅಧಿಕಾರಿಗಳು ತಕ್ಷಣ ತೋಟಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಬೇಕು ಹಾಗೂ ದ್ರಾವಣದ ಮಾದರಿಯನ್ನು ಪ್ರಯೋಗಾಲಯದ ಪರೀಕ್ಷೆಗೆ ಒಳಪಡಿಸಬೇಕು ಎಂದು ಸಂತ್ರಸ್ತ ಕೃಷಿಕರು ಮತ್ತು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.