ಸಿಗರೇಟ್ ಬೆಲೆ ಏರಿಕೆ ಬಿಸಿ

ಬೆಂಗಳೂರು: ಧೂಮಪಾನಿಗಳಿಗೆ ಬೆಲೆ ಏರಿಕೆಯ ಶಾಕ್ ಎದುರಾಗಿದೆ. ಕೇಂದ್ರ ಸರ್ಕಾರವು ಹೆಚ್ಚುವರಿ ಅಬಕಾರಿ ಸುಂಕವನ್ನು ಜಾರಿಗೆ ತಂದ ಬೆನ್ನಲ್ಲೇ, ಮಾರುಕಟ್ಟೆಯಲ್ಲಿ ಸಿಗರೇಟ್ ಬೆಲೆ ಗಣನೀಯವಾಗಿ ಏರಿಕೆಯಾಗಿದೆ. ವಿವಿಧ ಬ್ರ್ಯಾಂಡ್‌ಗಳ ಸಿಗರೇಟ್ ಪ್ಯಾಕ್‌ಗಳ ಮೇಲೆ ಕನಿಷ್ಠ 22 ರೂ.ನಿಂದ ಗರಿಷ್ಠ 55 ರೂ.ವರೆಗೆ ಬೆಲೆ ಏರಿಕೆ ಮಾಡಲಾಗಿದೆ.

ಸರ್ಕಾರದ ಆದೇಶ ಹೊರಬಿದ್ದ ತಕ್ಷಣವೇ ವಿತರಕರು ಹಳೆಯ ಸ್ಟಾಕ್‌ಗಳಿಗೂ ಹೊಸ ದರವನ್ನು ನಿಗದಿಪಡಿಸಿ ಮಾರಾಟ ಆರಂಭಿಸಿದ್ದಾರೆ. ಇಂದಿನಿಂದ ತಯಾರಿಕಾ ಕಂಪನಿಗಳು ಹೊಸ MRP (ಗರಿಷ್ಠ ಮಾರಾಟ ಬೆಲೆ) ಹೊಂದಿರುವ ಪ್ಯಾಕ್‌ಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುತ್ತಿವೆ. ದೇಶಾದ್ಯಂತ ಇರುವ ಸುಮಾರು 9,000 ಸ್ಟಾಕಿಸ್ಟ್‌ಗಳ ಮೂಲಕ ಈ ಹೊಸ ದರ ಜಾರಿಗೆ ಬರುತ್ತಿದ್ದು, ಚಿಲ್ಲರೆ ಮಾರಾಟಗಾರರು ಈಗಾಗಲೇ ಹೆಚ್ಚಿನ ದರಕ್ಕೆ ಸಿಗರೇಟ್ ಮಾರಾಟ ಮಾಡುತ್ತಿದ್ದಾರೆ.