ಓಲಾ-ಊಬರ್‌ಗೆ ಪೈಪೋಟಿ: ದೇಶದ ಮೊದಲ ಸಹಕಾರಿ ಕ್ಯಾಬ್ ಸೇವೆ ‘ಭಾರತ್ ಟ್ಯಾಕ್ಸಿ’ಗೆ ಅಮಿತ್ ಶಾ ಚಾಲನೆ!

ಸಹಕಾರಿ ತತ್ವದ ಅಡಿಯಲ್ಲಿ ರೂಪಿತವಾಗಿರುವ ನೂತನ ಕ್ಯಾಬ್ ಸೇವೆ 'ಭಾರತ್ ಟ್ಯಾಕ್ಸಿ' ಗುರುವಾರ ಅಧಿಕೃತವಾಗಿ ಚಾಲನೆ ಪಡೆಯಲಿದೆ. ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ದೆಹಲಿಯಲ್ಲಿ ಈ ಸೇವೆಗೆ ಚಾಲನೆ ನೀಡಲಿದ್ದು, ಅಮುಲ್ ನಂತಹ ಪ್ರತಿಷ್ಠಿತ ಸಂಸ್ಥೆಗಳ ಬೆಂಬಲದೊಂದಿಗೆ ಇದು ಕಾರ್ಯನಿರ್ವಹಿಸಲಿದೆ. ಓಲಾ ಮತ್ತು ಊಬರ್‌ನಂತಹ ದೈತ್ಯ ಕಂಪನಿಗಳ ಏಕಸ್ವಾಮ್ಯಕ್ಕೆ ಸವಾಲು ಹಾಕಲು ಸಜ್ಜಾಗಿರುವ ಈ ಸಂಸ್ಥೆಯನ್ನು 'ಸಹಕಾರ ಟ್ಯಾಕ್ಸಿ ಕೋಆಪರೇಟಿವ್ ಲಿಮಿಟೆಡ್' ನಿರ್ವಹಿಸುತ್ತಿದೆ. ಇದು ಸಂಪೂರ್ಣವಾಗಿ ಲಾಭೋದ್ದೇಶವಿಲ್ಲದ ಸಹಕಾರಿ ಮಾದರಿಯಾಗಿದ್ದು, ಚಾಲಕರು ಮತ್ತು ಗ್ರಾಹಕರಿಬ್ಬರಿಗೂ ಆರ್ಥಿಕ ಲಾಭ ತಂದುಕೊಡುವ ಗುರಿ ಹೊಂದಿದೆ.

ಈ ಸೇವೆಯ ವಿಶೇಷತೆಯೆಂದರೆ ಇಲ್ಲಿ ಚಾಲಕರೇ ಮಾಲೀಕರಾಗಿರುತ್ತಾರೆ. ಖಾಸಗಿ ಕಂಪನಿಗಳು ಪಡೆಯುವ ಶೇ. 30-40ರಷ್ಟು ಕಮಿಷನ್ ದಂಧೆಗೆ ಇಲ್ಲಿ ಬ್ರೇಕ್ ಹಾಕಲಾಗಿದ್ದು, ಯಾವುದೇ ಪ್ಲಾಟ್‌ಫಾರ್ಮ್ ಶುಲ್ಕವಿರುವುದಿಲ್ಲ. ಚಾಲಕರನ್ನು "ಸಾರಥಿಗಳು" ಎಂದು ಕರೆಯಲಾಗುತ್ತಿದ್ದು, ಅವರು ಕನಿಷ್ಠ 500 ರೂಪಾಯಿ ಹೂಡಿಕೆಯೊಂದಿಗೆ ಸಂಸ್ಥೆಯ ಪಾಲುದಾರರಾಗಬಹುದು. ಎಸಿ, ನಾನ್-ಎಸಿ, ಆಟೋ ಮತ್ತು ಬೈಕ್ ಟ್ಯಾಕ್ಸಿ ಸೇವೆಗಳು ಇದರಲ್ಲಿ ಲಭ್ಯವಿದ್ದು, ಸದ್ಯ ದೆಹಲಿ-ಎನ್‌ಸಿಆರ್‌ನಲ್ಲಿ ಆರಂಭವಾಗುತ್ತಿರುವ ಈ ಸೇವೆ ಶೀಘ್ರದಲ್ಲೇ ದೇಶದ ಇತರ ಪ್ರಮುಖ ನಗರಗಳಿಗೂ ವಿಸ್ತರಣೆಯಾಗಲಿದೆ.