ಇನ್‌ಸ್ಟಾಗ್ರಾಂ ರೀಲ್ಸ್ ನಂಬಿ 16 ವರ್ಷದ ಬಾಲಕನ ಹತ್ಯೆ; ‘ಮಾನವ ವೃಷಣ’ ಮಾರಾಟದ ಸುಳ್ಳು ಸುದ್ದಿ ನಂಬಿ ಭೀಕರ ಕೃತ್ಯ!

ಭೋಪಾಲ್: ಇನ್‌ಸ್ಟಾಗ್ರಾಂನಲ್ಲಿ ಹರಿದಾಡಿದ ಸುಳ್ಳು ರೀಲ್ಸ್‌ಗಳನ್ನು ನಂಬಿದ 20 ವರ್ಷದ ಬಿಬಿಎ ವಿದ್ಯಾರ್ಥಿಯೊಬ್ಬ, ಗಲ್ಫ್ ರಾಷ್ಟ್ರಗಳಲ್ಲಿ ಮಾನವ ವೃಷಣಗಳಿಗೆ ₹1ರಿಂದ ₹1.5 ಕೋಟಿ ವರೆಗೆ ಬೆಲೆ ಇದೆ ಎಂದು ಭಾವಿಸಿ, ಇತರರನ್ನು ನಂಬಿಸಿ 16 ವರ್ಷದ ಬಾಲಕನ ಹತ್ಯೆಗೆ ಕಾರಣನಾದ ಆರೋಪ ಕೇಳಿಬಂದಿದೆ.

ಭೋಪಾಲ್‌ನ ಜೋಹೆಬ್ ಖಾನ್ ಎಂಬ ಬಿಬಿಎ ವಿದ್ಯಾರ್ಥಿ ಇನ್‌ಸ್ಟಾಗ್ರಾಂನಲ್ಲಿ ಮಾನವ ವೃಷಣಗಳು ಗಲ್ಫ್ ರಾಷ್ಟ್ರಗಳಲ್ಲಿ ಕೋಟ್ಯಂತರ ರೂಪಾಯಿಗೆ ಮಾರಾಟವಾಗುತ್ತವೆ ಎಂಬ ರೀಲ್ಸ್‌ಗಳನ್ನು ನೋಡಿದ್ದಾನೆ ಎನ್ನಲಾಗಿದೆ. ಇದೇ ರೀತಿಯ ಮತ್ತಷ್ಟು ರೀಲ್ಸ್‌ಗಳು ಆತನಿಗೆ ಕಾಣಿಸಿಕೊಂಡ ಪರಿಣಾಮ, ಈ ಸುಳ್ಳು ಮಾಹಿತಿಯನ್ನೇ ಆತ ನಿಜವೆಂದು ನಂಬಿದ್ದಾನೆ.

ನಂತರ ವೈದ್ಯನಂತೆ ನಟಿಸಿದ ಜೋಹೆಬ್, ದೊಡ್ಡ ಮೊತ್ತದ ಹಣ ಗಳಿಸುವ ಅವಕಾಶವಿದೆ ಎಂದು ಕೆಲವರನ್ನು ನಂಬಿಸಿದ್ದಾನೆ. ಅವರಲ್ಲಿ ಅಮೀರ್ ಎಂಬಾತನೂ ಸೇರಿದ್ದಾನೆ. ಇನ್ನೂ ಕೆಲವರು ಅಪ್ರಾಪ್ತರು ಎನ್ನಲಾಗಿದ್ದು, ಅವರ ಗುರುತುಗಳನ್ನು ಪೊಲೀಸರು ಬಹಿರಂಗಪಡಿಸಿಲ್ಲ.

ಈ ಗುಂಪು ಬೀದಿಗಳಲ್ಲಿ ಪೆನ್ನುಗಳನ್ನು ಮಾರಾಟ ಮಾಡುತ್ತಿದ್ದ 16 ವರ್ಷದ ಬಡ ಬಾಲಕನನ್ನು ಆಮಿಷವೊಡ್ಡಿ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು, ಚಾಕುವಿನಿಂದ ಇರಿದು ಹತ್ಯೆ ಮಾಡಿದೆ ಎಂದು ಆರೋಪಿಸಲಾಗಿದೆ.

ಹತ್ಯೆಯ ಬಳಿಕ ಆರೋಪಿಗಳು ‘ಡಾ. ಜೋಹೆಬ್’ಗೆ ವಿಡಿಯೋ ಕಾಲ್ ಮಾಡಿದ್ದು, ಮೃತದೇಹದಿಂದ ವೃಷಣಗಳನ್ನು ಹೇಗೆ ತೆಗೆದು, ಐಸ್‌ ಬಾಕ್ಸ್‌ನಲ್ಲಿ ಸುರಕ್ಷಿತವಾಗಿ ಇಡಬೇಕು ಎಂಬುದರ ಕುರಿತು ಆತ ಸೂಚನೆ ನೀಡಿದ್ದಾನೆ ಎಂದು ವರದಿಯಾಗಿದೆ.

ನಂತರ ಜೋಹೆಬ್ ಗಲ್ಫ್ ರಾಷ್ಟ್ರಗಳಲ್ಲಿ ಖರೀದಿದಾರರನ್ನು ಹುಡುಕಲು ಪ್ರಯತ್ನಿಸಿದ್ದಾನೆ ಎನ್ನಲಾಗಿದೆ. ಆದರೆ ಯಾವುದೇ ಖರೀದಿದಾರ ಸಿಗದಿದ್ದಾಗ, ಇನ್‌ಸ್ಟಾಗ್ರಾಂ ರೀಲ್ಸ್‌ನಲ್ಲಿ ಹರಿದಾಡುತ್ತಿದ್ದ ಮಾಹಿತಿ ಸಂಪೂರ್ಣ ಸುಳ್ಳು ಎಂಬುದು ಆತನಿಗೆ ತಿಳಿದುಬಂದಿದೆ.

ಈ ನಡುವೆ, ಬಾಲಕನ ಮೃತದೇಹವನ್ನು ಭೋಪಾಲ್ ಪೊಲೀಸರು ಕೊಳೆತ ಸ್ಥಿತಿಯಲ್ಲಿ ಪತ್ತೆಹಚ್ಚಿದ್ದಾರೆ. ದೇಹದಲ್ಲಿದ್ದ ಟ್ಯಾಟೂ ಆಧರಿಸಿ ಬಾಲಕನ ತಾಯಿ ಆತನನ್ನು ಗುರುತಿಸಿದ್ದಾರೆ ಎಂದು ವರದಿಯಾಗಿದೆ.

ವೃಷಣಗಳನ್ನು ಆರೋಪಿಗಳು ಸಮೀಪದ ಕೆರೆಗೆ ಎಸೆದಿರುವ ಶಂಕೆ ವ್ಯಕ್ತವಾಗಿದ್ದು, ಅವುಗಳನ್ನು ಪತ್ತೆಹಚ್ಚಲು ಪೊಲೀಸರು ಡೈವರ್‌ಗಳ ನೆರವು ಪಡೆಯುತ್ತಿದ್ದಾರೆ ಎನ್ನಲಾಗಿದೆ.

ಪೊಲೀಸ್ ತನಿಖೆ ಮುಂದುವರಿದಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುವ ಪರಿಶೀಲಿಸದ ಮಾಹಿತಿಯನ್ನು ನಂಬಿ ಇಂತಹ ಅಪಾಯಕಾರಿ ಕೃತ್ಯಗಳಿಗೆ ಮುಂದಾಗುವ ಬಗ್ಗೆ ಪೊಲೀಸರು ಎಚ್ಚರಿಕೆ ನೀಡಿದ್ದಾರೆ.