ಫ್ಲೈದುಬೈ ವಿಮಾನ ಪತನದಂಚಿಗೆ: ಸಹ ಪೈಲಟ್‌ ಹಿನ್ನೆಲೆ ಬಗ್ಗೆ ಸ್ಫೋಟಕ ಮಾಹಿತಿ ಬಹಿರಂಗ

182 ಜನರನ್ನು ಹೊತ್ತೊಯ್ಯುತ್ತಿದ್ದ ಫ್ಲೈದುಬೈ ವಿಮಾನದಲ್ಲಿ ನಡೆದ ಆತಂಕಕಾರಿ ಘಟನೆ ಇದೀಗ ಮತ್ತಷ್ಟು ಗಂಭೀರ ತಿರುವು ಪಡೆದುಕೊಂಡಿದೆ. ವಿಮಾನವನ್ನು ಅಪಾಯಕ್ಕೆ ತಳ್ಳಿದ ಆರೋಪ ಎದುರಿಸುತ್ತಿರುವ ಸಹ ಪೈಲಟ್‌ಗೆ ಈ ಹಿಂದೆ ಒಮಾನ್‌ನಲ್ಲಿ ವಿಮಾನ ಹಾರಾಟ ನಡೆಸದಂತೆ ನಿಷೇಧಿಸಲಾಗಿತ್ತು ಎಂಬ ಮಾಹಿತಿ ಹೊರಬಂದಿದೆ.

ತನಿಖೆಗೆ ಸಂಬಂಧಿಸಿದ ಮಾಹಿತಿಯನ್ನು ಹೊಂದಿರುವ ವ್ಯಕ್ತಿಯೊಬ್ಬರ ಪ್ರಕಾರ, ಸಹ ಪೈಲಟ್ ಉಗ್ರವಾದಿ ವಿಚಾರಧಾರೆಗಳಿಗೆ ಒಲವು ಹೊಂದಿದ್ದಾನೆ ಎಂಬ ಶಂಕೆಯ ಹಿನ್ನೆಲೆಯಲ್ಲಿ ಒಮಾನ್‌ನಲ್ಲಿ ಆತನಿಗೆ ಹಾರಾಟ ನಿರ್ಬಂಧ ವಿಧಿಸಲಾಗಿತ್ತು. ಆದರೆ ನಂತರ ಯುನೈಟೆಡ್ ಅರಬ್ ಎಮಿರೇಟ್ಸ್ ಮೂಲದ ವಿಮಾನಯಾನ ಸಂಸ್ಥೆಯೊಂದು ಆತನನ್ನು ನೇಮಕ ಮಾಡಿಕೊಂಡಿತ್ತು ಎನ್ನಲಾಗಿದೆ.

ಆದರೆ ಯುಎಇಯಲ್ಲಿ ನೇಮಕ ಮಾಡುವ ಸಂದರ್ಭದಲ್ಲಿ ಆತನ ಹಿಂದಿನ ದಾಖಲೆಗಳು ಮತ್ತು ಭದ್ರತಾ ಹಿನ್ನೆಲೆಯನ್ನು ಎಷ್ಟು ಮಟ್ಟಿಗೆ ಪರಿಶೀಲಿಸಲಾಗಿತ್ತು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಈ ಬಗ್ಗೆ ತನಿಖೆ ಮುಂದುವರಿದಿದ್ದು, ಅಧಿಕಾರಿಗಳು ಹಲವು ಆಯಾಮಗಳಲ್ಲಿ ಮಾಹಿತಿ ಸಂಗ್ರಹಿಸುತ್ತಿದ್ದಾರೆ.

ಈ ಹಿಂದೆ ಸಹ ಪೈಲಟ್‌ಗೆ ಒಮಾನ್‌ನಲ್ಲಿ ಹಾರಾಟ ನಿಷೇಧಿಸಲಾಗಿತ್ತು ಎಂಬ ವಿಷಯವನ್ನು ವಾಲ್ ಸ್ಟ್ರೀಟ್ ಜರ್ನಲ್ ವರದಿ ಮಾಡಿತ್ತು.

ಕಾಕ್‌ಪಿಟ್‌ನಲ್ಲೇ ನಡೆದಿತ್ತು ಘರ್ಷಣೆ

ಟೆಲ್ ಅವೀವ್‌ಗೆ ತೆರಳುತ್ತಿದ್ದ ಬೋಯಿಂಗ್ 737 ವಿಮಾನದಲ್ಲಿ 174 ಪ್ರಯಾಣಿಕರು ಹಾಗೂ ಎಂಟು ಸಿಬ್ಬಂದಿ ಇದ್ದರು. ವಿಮಾನ ಹಾರಾಟ ಆರಂಭಿಸಿ ಎರಡು ಗಂಟೆಗಳಿಗೂ ಹೆಚ್ಚು ಸಮಯದ ಬಳಿಕ ಕಾಕ್‌ಪಿಟ್‌ನಲ್ಲಿ ಗಂಭೀರ ಪರಿಸ್ಥಿತಿ ನಿರ್ಮಾಣವಾಯಿತು.

ಪ್ರಯಾಣಿಕರ ಹೇಳಿಕೆಯ ಪ್ರಕಾರ, ಕಾಕ್‌ಪಿಟ್ ಒಳಗಿನಿಂದ ಹೊಡೆದಾಟದಂತಹ ಶಬ್ದಗಳು ಕೇಳಿಬಂದ ಕೆಲವೇ ಕ್ಷಣಗಳಲ್ಲಿ ವಿಮಾನ ತೀವ್ರವಾಗಿ ಕೆಳಕ್ಕೆ ಇಳಿಯಲು ಆರಂಭಿಸಿತು. ವಿಮಾನ ಸುಮಾರು 16,600 ಅಡಿ ಎತ್ತರ ಕಳೆದುಕೊಂಡಿದ್ದು, ಕೆಲ ಸಮಯದ ನಂತರ ಮತ್ತೆ ಎತ್ತರವನ್ನು ಪಡೆದುಕೊಂಡಿತು.

ವಿಮಾನದಲ್ಲಿದ್ದ ಪ್ರಯಾಣಿಕರು ಪರಿಸ್ಥಿತಿಯನ್ನು ಅರಿತು ಆತಂಕಕ್ಕೊಳಗಾದರು. ಮಕ್ಕಳು ಕಿರುಚುತ್ತಿದ್ದ ದೃಶ್ಯ ಭಯಾನಕವಾಗಿತ್ತು ಎಂದು ಪ್ರಯಾಣಿಕರೊಬ್ಬರು ವಿವರಿಸಿದ್ದಾರೆ.

ಪೈಲಟ್‌ಗೆ ನೆರವಾದ ಪ್ರಯಾಣಿಕರು

ಕಾಕ್‌ಪಿಟ್ ಬಾಗಿಲು ತೆರೆಯುವಲ್ಲಿ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಯಶಸ್ವಿಯಾದ ಬಳಿಕ, ಕೆಲ ಪ್ರಯಾಣಿಕರು ಒಳಗೆ ಪ್ರವೇಶಿಸಿ ಸಹ ಪೈಲಟ್‌ನನ್ನು ನಿಯಂತ್ರಿಸಿದ್ದಾರೆ ಎನ್ನಲಾಗಿದೆ.

ಪ್ರಯಾಣಿಕರು ಆತನನ್ನು ಕಾಕ್‌ಪಿಟ್‌ನಿಂದ ಹೊರಗೆಳೆದು ಕ್ಯಾಬಿನ್‌ನ ನೆಲಕ್ಕೆ ಕೆಡವಿದರು. ಬಳಿಕ ಹೆಡ್‌ಫೋನ್ ಬಳಸಿ ಆತನ ಕೈಗಳನ್ನು ಕಟ್ಟಿಹಾಕಿದರು.

ಈ ವೇಳೆ ಕ್ಯಾಪ್ಟನ್ ಮಚ್ಚಾರ್ ಕೂಡ ಗಾಯಗೊಂಡಿದ್ದರು. ವಿಮಾನದಲ್ಲಿದ್ದ ದಂತ ವೈದ್ಯರೊಬ್ಬರು ಅವರಿಗೆ ಪ್ರಾಥಮಿಕ ಚಿಕಿತ್ಸೆ ನೀಡಿದರು.

ಪ್ರಯಾಣಿಕರ ಪ್ರಕಾರ, ಕಾಕ್‌ಪಿಟ್ ಅಥವಾ ವಿಮಾನದಲ್ಲಿ ಯಾವುದೇ ಚಾಕು ಅಥವಾ ಇತರ ಆಯುಧಗಳು ಕಂಡುಬಂದಿಲ್ಲ.

ವಿಮಾನ ಸುರಕ್ಷಿತವಾಗಿ ಲ್ಯಾಂಡಿಂಗ್

ಘಟನೆಯ ನಡುವೆಯೂ ಉಳಿದ ಸಿಬ್ಬಂದಿ ವಿಮಾನದ ನಿಯಂತ್ರಣವನ್ನು ಮರಳಿ ಪಡೆದುಕೊಂಡು ಸೌದಿ ಅರೇಬಿಯಾದ ಟಬುಕ್‌ನಲ್ಲಿ ವಿಮಾನವನ್ನು ಸುರಕ್ಷಿತವಾಗಿ ಇಳಿಸಿದರು.

ಗಾಯಗೊಂಡಿದ್ದ ಕ್ಯಾಪ್ಟನ್ ಮಚ್ಚಾರ್ ಮತ್ತು ಸಹ ಪೈಲಟ್ ಅವರನ್ನು ಬಳಿಕ ಸೌದಿ ಅರೇಬಿಯಾದಿಂದ ಯುಎಇಗೆ ಸ್ಥಳಾಂತರಿಸಲಾಯಿತು. ಕ್ಯಾಪ್ಟನ್ ಮಚ್ಚಾರ್ ಅಬುಧಾಬಿಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಘಟನೆಯ ಬಳಿಕ ಈ ಪ್ರಕರಣದ ಹಿಂದೆ ಯಾವುದೇ ಉಗ್ರ ಸಂಘಟನೆ ಅಥವಾ ಹೊರಗಿನ ಶಕ್ತಿಯ ಕೈವಾಡವಿದೆಯೇ ಎಂಬ ಪ್ರಶ್ನೆಯೂ ಉದ್ಭವಿಸಿದೆ. ಆದರೆ ತನಿಖಾಧಿಕಾರಿಗಳ ಪ್ರಕಾರ, ಸಹ ಪೈಲಟ್‌ಗೆ ಇರಾನ್ ಅಥವಾ ಯಾವುದೇ ನಿರ್ದಿಷ್ಟ ಸಂಘಟನೆಯೊಂದಿಗೆ ಸಂಪರ್ಕವಿದೆ ಎಂಬುದಕ್ಕೆ ಸದ್ಯಕ್ಕೆ ದೃಢವಾದ ಸಾಕ್ಷ್ಯ ಲಭ್ಯವಾಗಿಲ್ಲ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಾತ್ರ ದಾಳಿಗೂ ಇರಾನ್‌ಗೂ ಸಂಪರ್ಕವಿರುವ ಸಾಧ್ಯತೆಯ ಬಗ್ಗೆ ಪ್ರಾಥಮಿಕ ಮಾಹಿತಿ ದೊರೆತಿದೆ ಎಂದು ಹೇಳಿದ್ದು, ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸಿಲ್ಲ.

ಘಟನೆಯ ನಿಜವಾದ ಕಾರಣ, ಸಹ ಪೈಲಟ್‌ನ ಉದ್ದೇಶ ಹಾಗೂ ಆತನ ಹಿಂದಿನ ಭದ್ರತಾ ಹಿನ್ನೆಲೆ ಕುರಿತು ತನಿಖೆ ಮುಂದುವರಿದಿದೆ.