ಭಾರತದ ಟಾಪ್ 10 ಶ್ರೀಮಂತ ಮಹಿಳಾ ಉದ್ಯಮಿಗಳ ಪಟ್ಟಿ ಪ್ರಕಟ: ಮಂಗಳೂರು ಮೂಲದ ಜಯಶ್ರೀ ಉಳ್ಳಾಲ್‌ಗೆ ಅಗ್ರಸ್ಥಾನ

ಹ್ಯುರೂನ್‌ ರೀಸರ್ಚ್‌ ಬಿಡುಗಡೆ ಮಾಡಿದ 'ಇಂಡಿಯಾ ರಿಚ್ ಲಿಸ್ಟ್ 2025' ರ ಪ್ರಕಾರ ಭಾರತದ ಅತ್ಯಂತ ಶ್ರೀಮಂತ ಮಹಿಳಾ ಉದ್ಯಮಿಗಳ ಪಟ್ಟಿ ಪ್ರಕಟಗೊಂಡಿದೆ. ಈ ಪಟ್ಟಿಯಲ್ಲಿ ಮಂಗಳೂರು ಮೂಲದ ಜಯಶ್ರೀ ಉಳ್ಳಾಲ್‌ ಅವರು 50,170 ಕೋಟಿ ರೂಪಾಯಿಗಳ ಸಂಪತ್ತಿನೊಂದಿಗೆ ಅಗ್ರಸ್ಥಾನ ಪಡೆದುಕೊಂಡು ಎಲ್ಲರ ಗಮನ ಸೆಳೆದಿದ್ದಾರೆ. ಅವರು 2008 ರಿಂದ ಕಂಪ್ಯೂಟರ್ ನೆಟ್‌ವರ್ಕಿಂಗ್ ಸಂಸ್ಥೆಯಾದ ಅರಿಸ್ಟಾ ನೆಟ್‌ವರ್ಕ್ಸ್‌ನ ಅಧ್ಯಕ್ಷೆ ಮತ್ತು ಸಿಇಒ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಕಳೆದ ವರ್ಷ $7 ಬಿಲಿಯನ್ ಆದಾಯವನ್ನು ದಾಖಲಿಸಿದ ಅರಿಸ್ಟಾ ನೆಟ್‌ವರ್ಕ್ಸ್‌ನಲ್ಲಿ ಉಳ್ಳಾಲ್‌ ಅವರು ಸುಮಾರು ಶೇ 3ರಷ್ಟು ಷೇರುಗಳನ್ನು ಹೊಂದಿದ್ದಾರೆ. ಅರಿಸ್ಟಾಕ್ಕೂ ಮೊದಲು ಅವರು ಸಿಸ್ಕೋ ಸಿಸ್ಟಮ್ಸ್ ಸೇರಿದಂತೆ ಪ್ರಮುಖ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿದ್ದರು.

ಜಯಶ್ರೀ ಉಳ್ಳಾಲ್‌ ನಂತರ, ರಾಧಾ ವೆಂಬು (46,580 ಕೋಟಿ ರೂ.) ಎರಡನೇ ಸ್ಥಾನದಲ್ಲಿದ್ದರೆ, ಸೌಂದರ್ಯ ಉತ್ಪನ್ನಗಳ ಚಿಲ್ಲರೆ ವ್ಯಾಪಾರಿ ನೈಕಾವನ್ನು ಪ್ರಾರಂಭಿಸಿದ ಫಲ್ಗುಣಿ ನಾಯರ್‌ (39,810 ಕೋಟಿ ರೂ.) ಮೂರನೇ ಸ್ಥಾನದಲ್ಲಿದ್ದಾರೆ. ಜೈವಿಕ ತಂತ್ರಜ್ಞಾನದಲ್ಲಿ ಖ್ಯಾತಿ ಗಳಿಸಿರುವ ಬಯೋಕಾನ್‌ನ ಕಿರಣ್ ಮಜುಂದಾರ್-ಶಾ ಅವರು 29,330 ಕೋಟಿ ರೂ. ಸಂಪತ್ತಿನೊಂದಿಗೆ ನಾಲ್ಕನೇ ಸ್ಥಾನದಲ್ಲಿದ್ದಾರೆ. ಇದರ ಜೊತೆಗೆ, ಆಫ್‌ಬಿಸಿನೆಸ್‌ನ ಸಹ-ಸಂಸ್ಥಾಪಕಿ ರುಚಿ ಕಾ (9,130 ಕೋಟಿ ರೂ.) ಐದನೇ ಸ್ಥಾನವನ್ನು ಪಡೆದಿದ್ದಾರೆ.

ಭಾರತದ ಟಾಪ್ ಟೆನ್ ಶ್ರೀಮಂತ ಮಹಿಳೆಯರ ಪಟ್ಟಿಯಲ್ಲಿ ಇತರ ಪ್ರಮುಖ ಉದ್ಯಮಿಗಳು ಕೂಡ ಸ್ಥಾನ ಪಡೆದಿದ್ದಾರೆ. ಖ್ಯಾತ ನಟಿ ಜೂಹಿ ಚಾವ್ಹಾ ಮತ್ತು ಕುಟುಂಬ 7,790 ಕೋಟಿ ರೂ. ಸಂಪತ್ತಿನೊಂದಿಗೆ ಆರನೇ ಸ್ಥಾನದಲ್ಲಿದ್ದರೆ, ಲೆನ್ಸ್‌ಕಾರ್ಟ್‌ನ ಸಹ-ಸಂಸ್ಥಾಪಕಿ ನೇಹಾ ಬನ್ಸಾಲ್ (5,640 ಕೋಟಿ ರೂ.) ಏಳನೇ ಸ್ಥಾನದಲ್ಲಿದ್ದಾರೆ. ಪೆಪ್ಸಿಕೋದ ಮಾಜಿ ಸಿಇಒ ಇಂದ್ರಾ ನೂಯಿ (5,130 ಕೋಟಿ ರೂ.) ಎಂಟನೇ ಸ್ಥಾನದಲ್ಲಿದ್ದು, ಕಾನ್ಸುನೆಟ್‌ನ ಸಹ-ಸಂಸ್ಥಾಪಕಿ ನೇಹಾ ನರ್ಖೇಡೆ ಕುಟುಂಬ (4,160 ಕೋಟಿ ರೂ.) ಒಂಬತ್ತನೇ ಸ್ಥಾನದಲ್ಲಿದ್ದಾರೆ. ಅಪ್‌ಸ್ಟಾಕ್ಸ್‌ನ ಸಹ-ಸಂಸ್ಥಾಪಕಿ ಕವಿತಾ ಸುಬ್ರಹ್ಮಣ್ಯಂ (3,840 ಕೋಟಿ ರೂ.) ಹತ್ತನೇ ಸ್ಥಾನದೊಂದಿಗೆ ಭಾರತದ ಟಾಪ್ ಟೆನ್‌ ಶ್ರೀಮಂತ ಮಹಿಳೆಯರ ಪಟ್ಟಿಯನ್ನು ಪೂರ್ಣಗೊಳಿಸಿದ್ದಾರೆ.